港超聯　前線未齊腳！冠忠南區目標上半版

港超球隊冠忠南區周一（15日）在黃竹坑運動場進行公開操練，會長陳文俊接受訪問時，透露今季班費將維持800至900萬，又稱會再增添新兵，目標站穩聯賽榜上半版，球隊之後或前往內地集訓。

是日操練除外援川瀨浩太未歸隊、小將莊晉正在泰國集訓外，其餘球員包括5名新兵陳嘉昊、恩奴、亞哥斯達、宋柱浩，以及即場宣布加盟的U18球員張國鋒皆有現身。會長陳文俊受訪時，透露今季班費將維持800至900萬，又承認前鋒達施華突然因個人家庭問題離隊，打亂球隊部署，之後很大機會再簽人：「成件事好突然，我又唔會話急住揾一個替補，因為我哋唔係超級班霸，錢好重要。要慢慢再揀，唔急嘅，但依家唔係好夠人，都要執番一個半個球員。」值得一提，球隊大軍暫只有22人，當中上季首席射手史提芬彭利拿、古安奴、杜馬思等8名球員未獲續約，借用的趙聡悟、陳傲軒亦返回傑志。

對於主力射手「肥彭」離隊，陳文俊則顯得十分無奈：「我哋同『肥彭』好好關係，完全冇嘢，純粹嚟個變化，都想球隊年輕啲。如果我係有錢球會，會留番佢，多個本地球員有咩所謂。」南區上季未能衞冕「賽馬會菁英盃」，聯賽亦只能排第5名，陳文俊坦言成績絕對令人失望，盼全隊上下今季可以調整心態，力爭站穩聯賽榜上半版：「舊年一開季球員太過心雄，有啲高估咗自己，當正自己係一隊強隊，可以同傑志、理文打。我覺得唔係，南區只係中游球隊，希望今年應該贏嘅波要贏，下風啲嘅波就踢出驚喜。」

至於主教練楊正光則表示達施華離隊後，前鋒的確缺人，需要進一步加強人手：「人數唔理想，仲差一至兩位球員，主要係前鋒或者本地中前場球員，而後防就比上年充裕咗。」「光Sir」續指今季目標至少殺入盃賽決賽，並爭取聯賽前3名。

【冠忠南區球員名單】

門將：1.伍瑋謙、13.陳嘉昊、31.顏翱天

後衞：2.陳潤潼、4.川瀨浩太、5.恩奴、6.基斯、14.宋柱浩、16.翟廷峯、26.陳凱柏

中場：7.李小恆、8.李嘉耀、10.亞哥斯達、11.佐佐木周、15.黎格爾、23.容昊、24.鞠盈智、27.莊晉、28.張國鋒

前鋒：18.艾華、20.游卓峰、90.積遜