奧巴美揚宣布轉戰沙特　格連活特抵馬賽接班

法甲勁旅馬賽獲薩迪比執教後，今夏積極進行組軍，上季球隊首席射手奧巴美揚周三(17日)宣布離隊，將加盟沙特豪門艾卡迪西亞，而英格蘭前鋒格連活特亦同日飛抵馬賽，將會簽約至2029年。

上季各項賽事為馬賽入30球嘅奧巴美揚，喺社交網宣布離隊消息：「我係時候展開新一頁，喺馬賽呢1年充滿激情，好多謝職員、隊友同球迷嘅支持。」奧巴美揚將會加盟沙特新升班球隊艾卡迪西亞，佢哋背後有阿拉伯能源公司沙特阿美支持，準備喺轉會市場上大展拳腳。

馬賽失去奧巴美揚後，將會簽入曼聯前鋒格連活特，呢位因捲入「虐打女友」官非而被放逐嘅球星，將以3,000萬歐元轉會費加盟，完成體測後就會簽約5年。