【官宣】莫迪歷續約皇馬兼接任隊長

皇家馬德里日前舉行基利安麥巴比亮相儀式後，周四(18日)再宣布克羅地亞中場莫迪歷續約1年，呢位38歲老將更會接替離隊嘅拿祖費南迪斯，成為皇馬新任隊長。

莫迪歷上季喺皇馬失去正選位置，一度有傳佢會重返克羅地亞，但佢喺歐聯決賽後已表明將會留隊，皇馬周四正式宣布同佢續約1年，將會係佢第13季代表皇馬出賽。

由於隊長拿祖費南迪斯離隊，莫迪歷續約後正式成為球隊新隊長，而且會繼續着10號波衫，選擇着9號嘅麥巴比日前喺亮相會就話：「10號係屬於莫迪歷，好榮幸可以同佢一齊比賽，佢係冠軍同金球獎得主，我非常敬重佢。」