【有片】捷西斯1傳1射　阿仙奴熱身旗開得勝

阿仙奴新球季備戰正式「開工」，周六(20日)喺訓練場進行閉門熱身賽，憑巴西前鋒加比爾捷西斯1傳1射，輕鬆2比0擊敗英甲球會奧連特。阿仙奴大軍周日(21日)起程展開美國之旅，據報一眾歐國盃球星將分批歸隊。

阿仙奴今場有唔少主力落場，上半場一次左路美妙組織，加比爾捷西斯接應尼基迪亞傳中後，一控一射先拔頭籌。控制大局嘅阿仙奴，下半場憑加比爾捷西斯底線笠入中路，奧連特門將拍出唔遠，伊美路維第一時間撞射入網，首場熱身贏2比0。

阿仙奴入球片段：https://twitter.com/i/status/1814706642081972377　

阿仙奴周日飛美國集訓，將會連鬥般尼茅夫、曼聯同利物浦，陣中有份出戰歐國盃嘅球員會分批歸隊，佐真奴費路同辛真高喺對奧連特一仗雖冇上陣，但已現身球場，而李安度杜沙特、夏維斯稍後會去美國報到，布卡約沙卡、迪格蘭賴斯等出戰歐國盃決賽球員，就會缺席美國之行。