曼聯睇中「新洛迪」　6000萬歐元可成交

曼聯近期積極增兵，最新消息指紅魔鬼睇中皇家蘇斯達中場蘇比文迪，據悉呢位25歲西班牙國腳現時毀約金為6,000萬歐元(約5.1億港元)，以曼聯嘅財力絕對買得起。

曼聯早前已經簽入前鋒約舒亞舒克斯、中堅約羅，現時重點收購防守中場，代替水準今非昔比嘅卡斯米路，蘇比文迪成為紅魔鬼嘅頭號目標。呢位防中出身於皇蘇青訓系統，過去4季都係球隊主力，包括上季各項賽事上陣45場入4球及1次助攻。

蘇比文迪有份協助西班牙捧今屆歐國盃冠軍，期間上陣4次有1次正選，由於佢踢法似曼城中場洛迪卡斯簡迪，兩人亦係西班牙國家隊隊友，因此蘇比文迪有「新洛迪」之稱，獲得多間大球會垂青。除咗曼聯之外，拜仁慕尼黑、阿仙奴、巴塞隆拿都有意收購蘇比文迪，相信佢嘅身價唔只值6,000萬歐元。