女足奇遇記！澳洲落後3球大逆轉　6比5驚天反勝

奧運女足分組賽出現戲劇性一幕，B組澳洲女足喺一度落後3球嘅劣勢下，90分鐘攻入驚天絕殺，6比5神奇反勝贊比亞女足，保住出線希望。至於因無人機事件被扣6分嘅加拿大女足，喺A組以2比1擊敗法國女足，2戰全勝下變番做0分，最後一輪贏埋嘅話仲有機會出線。

首仗吞德國女足3蛋嘅澳洲，今場1分鐘就已經落後，贊比亞前鋒賓達上半場連中三元，澳洲半場落後2比4；換邊後贊比亞好快再入1球，落後3粒嘅澳洲隨即變陣，果然即刻大翻身，58分鐘到78分鐘內連入3球追成5比5，去到完場前一刻再由老將希雯絕殺，戲劇性贏6比5。

贊比亞小組2連敗後，出線機會渺茫，不過佢哋嘅38歲老將拿祖娜亦締造歷史，呢位前田徑運動員，喺2008年北京奧運曾經代表贊比亞出戰400米跑，今屆就以女足球員身份再戰奧運，成為贊比亞兩項運動嘅奧運代表。澳洲目前喺B組1勝1負，下仗對美國女足拎1分就可出線。

女足分組賽次輪完結，B組嘅美國女足同C組嘅西班牙女足都係2戰全勝，率先進身8強。