【官宣】阿仙奴簽卡拉科利　對利物浦或首演

英超勁旅阿仙奴周二(30日)宣布，成功由博洛尼亞簽入意大利國腳卡拉科利，據報轉會費達4,200萬鎊，呢位22歲守將會着起33號波衫。卡拉科利日前喺倫敦完成體測後，周二閃電喺阿仙奴嘅美國集訓營亮相，有機會喺周四(1日)朝早對利物浦嘅熱身賽披甲。

卡拉科利簽約後表示：「感覺好神奇，我12、13歲就夢想踢英超，喺阿迪達同伊度(總監)說服我之前，我已經下決心要加盟阿仙奴。」卡拉科利直飛美國會合大軍後，同阿迪達見面擁抱嗰陣興奮表示：「呢個係咪現實？」阿迪達就回應：「呢個真係現實嚟！」

卡拉科利透露，意大利國家隊隊友佐真奴費路亦有份遊說佢加盟：「佢一直叫我過阿仙奴，話呢個係我未來幾年最佳選擇，其實我當時已經揸定主意(加盟)。」卡拉科利喺羅馬青年軍出身，2年前外流瑞士巴素利，上年加盟博洛尼亞後表現突出，喺夏天歐國盃亦有出色表現。