安素歸隊再度道歉　「捐錢」望平息風波

安素費南迪斯已經飛抵美國，同車路士會合，呢位阿根廷國腳再次就捲入「種族歧視歌」風波，向隊友道歉，並願意捐錢畀反種族歧視組織，為自己犯下過錯作出補償，希望獲得原諒，平息風波，專注備戰新球季。

阿根廷早前奪得美洲盃冠軍後，網上流出影片見到安素費南迪斯等國腳，喺隊巴內唱種族歧視法國球員嘅歌曲，雖然佢立即作出道歉，但仍然遭各界口誅筆伐，多位車仔嘅法國籍球員取消關注安素嘅社交網，以示不滿，甚至傳出會方可能出售呢位23歲中場。

根據英國《每日郵報》爆料，安素費南迪斯周一(29日)返回車仔報到，立即再次道歉，並捐錢畀反種族歧視組織，以示誠意，加上列斯占士、阿素迪沙斯從中作出調解，安素重新獲得接納，同大隊一齊操練同食午餐。

包括阿素迪沙斯在內，車仔有6位法國球員參加今次美國之旅集訓，既然佢願意擔任「和事佬」，相信「法國幫」應該會放過安素。領隊馬利斯卡早前表示，安素同隊友並冇矛盾，車路士將於8月1日早上熱身賽對CF阿美利加，安素費南迪斯有望披甲。