港超聯　轉投均業北區　龐焯熙：想畀隊友安全感

港超聯球隊均業北區周四（8日）舉行開操儀式，並即場宣布簽入12名新球員，其中龐焯熙（Bear）透露曾獲其他港超球隊斟介，但考慮出場機會，而且自己與北區副總監兼門將教練何國泉交情深厚，因而決定加盟北區「希望畀到隊友安全感」

Bear上季效力晉峰，可惜「粉紅兵團」棄戰港超，他是日透露此前曾收到新升班的九龍城邀請，但考慮出場機會後，加上曾與北區副總監兼門將教練何國泉共事多年，最終選擇加盟北區：「九龍城『剛Sir』（九龍城主教練陳銘剛）有搵過我，但我小四已經開始跟『何Sir』（何國泉）練波，大家又有Keep住聯絡，所以最後揀咗北區，有信心喺度有多啲上陣機會。」

談到來季展望，Bear盼能夠發揮應有水準，令隊友無後顧之憂：「只要我守好大門，畀到信心隊友，佢哋就可以花多啲心機進攻，希望幫到球隊贏多幾場，始終我前幾季無論踢邊隊，都係排榜尾，希望嚟緊呢季排名可以前啲。」