擔任球賽嘉賓　貝碧托夫：港隊踢得吓！

曼聯名宿「瀟灑哥」貝碧托夫周日（11日）現身旺角大球場，為港隊U16鬥曼聯U16的「賽馬會青少年足球精英匯」賽事，擔任嘉賓，他賽後稱讚港隊多次壓前搶攻，表現爭氣。

貝碧托夫是日賽前於旺角場現身，繞場一周與球迷自拍，大受歡迎，他亦相當親民，不時向球迷揮手致意。這位保加利亞名將其後繼續觀賞賽事，並擔任頒獎嘉賓，與兩隊職球員合照，為賽事收尾。

貝碧托夫活動後接受傳媒訪問，他賽後稱讚港隊小將表現落力，不斷壓上爭取入球，使他印象深刻：「有幾個港隊球員踢得特別好，畀波走位都有板有眼，睇得出佢哋好想喺主場球迷面前入番球，雖然最終事與願違，但我相信港隊嘅表現會令大家感到滿意。」

曼聯周六（10日）晚上在社區盾，戰至互射12碼才不敵同市宿敵曼城，失落冠軍，貝碧托夫對此感到可惜，但他認為球隊在開季能否交出應有表現，才是重中之重：「好多球員都試過射失12碼，希望曼聯球員盡快收拾心情，開季之後交出穩定發揮，喺聯賽爭取好成績。」