利物浦空歡喜　蘇比文迪拒投紅軍

早前有消息指利物浦將會簽入皇家蘇斯達中場蘇比文迪，但根據「轉會權威」記者羅曼諾(Fabrizio Romano)爆料，呢位25歲西班牙國腳已經拒絕加盟紅軍，即使皇蘇開出嘅續約薪酬唔及利記吸引，佢都願意選擇續約，留隊決心非常堅定。

蘇比文迪現時合約解約金為5,100萬鎊(約5.1億港元)，利物浦計劃直接用呢個數額買斷佢，但皇蘇管理層同蘇比文迪詳細會談之後，成功說服佢留隊，並將會續約。

有「新沙比阿朗素」之稱嘅蘇比文迪屬於皇蘇青訓產品，對於母會有深厚感情，經過會方全力挽留，加上佢熱愛皇蘇所在嘅巴斯克地區食物，以及喜愛喺當地行山，所以就算皇蘇開出嘅人工低過利物浦提供嘅合約，佢都唔介意。事實上，蘇比文迪近年都曾經拒絕阿仙奴、拜仁慕尼黑邀請加盟。

利物浦今夏仍然未簽入任何球員，加上蘇比文迪拒絕來投，意味新領隊施洛惟有用現有人腳，應付英超開鑼戰對葉士域治。