施捷斯尼同祖雲達斯解約　重返阿仙奴？

意大利傳媒報道，祖雲達斯同波蘭門將施捷斯尼周二(13日)達成解約協議，令呢位34歲鋼門回復自由身。施捷斯尼去向眾說紛紜，有傳佢考慮提早掛靴，亦有傳佢會重返出道球會阿仙奴。

祖雲達斯夏天簽入迪基哥里奧後，效力球隊7年嘅施捷斯尼就被放棄，雙方同意提前解約，據《都靈體育報》報道，施捷斯尼將考慮其他球會聘約，但如果收唔到合適嘅合約，就會考慮提早掛靴。

消息指有美職球會提出斟介，甚至有傳可能重返阿仙奴。由於阿仙奴計劃出售2號門將蘭斯達爾，而「兵工廠」青訓出身嘅施捷斯尼仍符合「本土培訓資格」，而且仲唔使轉會費，唯一障礙係佢接近20萬鎊嘅周薪，唔係太多球會負擔得起。