一個原因　利物浦計劃出售遠藤航

利物浦今夏仍然未簽入新球員，但準備再賣人，根據英國《太陽報》爆料，紅軍計劃以1,500萬鎊(約1.5億港元)出售中場遠藤航，因為新領隊施洛認為賴恩格雲貝治、巴斯迪比呢位日本國腳更適合踢中場中位置。

遠藤航上季由史特加加盟利物浦，各項賽事上陣43場，並有2球進帳，表現不俗，但施洛似乎並唔多欣賞呢位31歲中場，傾向用荷蘭國腳賴恩格雲貝治擔任中場中位置，拍住阿歷斯麥亞里士打、蘇保斯拉爾，19歲小將巴斯迪作為賴恩格雲貝治嘅副選，所以遠藤航已經唔屬於施洛組軍計劃之內。

利物浦有意出售遠藤航消息傳出之後，些路迪準備出手簽入佢，呢支蘇超勁旅近年招攬多位日本球員，加上領隊羅渣士曾執教利物浦，雙方關係良好，有望促成交易。