般茅破轉會紀錄簽巴西神鋒　波圖又賺一筆

英超球會般尼茅夫日前將首席射手蘇蘭基賣去熱刺，隨即重錘出擊收購替補人選，據報佢哋已傾掂用4,000萬鎊轉會費，收購波圖嘅巴西前鋒法蘭斯高艾雲尼臣，呢位24歲前鋒已飛抵英國進行體測，日內正式簽約。

般尼茅夫以6,500萬鎊賣走蘇蘭基後，立即4,000萬鎊搶購艾雲尼臣，打破6年前用2,500萬鎊簽謝法臣拿馬嘅球會紀錄。伊雲尼臣上季喺波圖各項賽事攻入25球，今年5月更入選巴西國家隊，將會成為般尼茅夫鋒線領軍人物。

葡超班霸波圖向來以擅長高價賣人見稱，佢哋4年前喺巴西丙組球會簽入伊雲尼臣，轉會費只係700萬鎊，今次賣佢去英超又賺一筆。