趙正宇突轉戰泰國T3　李輝立：相信經紀另有目的

港超球隊標準流浪周五（23日）舉行新季發布會，轉任總幹事的李輝立（Philip），透露上季表現突出的小將趙正宇，將離隊轉投T3球隊，相信經紀是另有目的。同時Philip又證實另一小將陳耀祖因剛完成手術，或會缺陣一段時間。

年僅18歲的趙正宇上季嶄露頭角，各項賽事為標準流浪上陣22場，貢獻3入球、2助攻，惟新季的球員名單卻未見這名中場的名字。會後總幹事李輝立接受訪問，證實「宇仔」將會離隊：「我都唔明佢本身踢緊超聯，點解會去T3踢，又唔係去讀書，嗰隊波只係一支由青年軍組成嘅新升班球隊，冇咩組織，嘗試聯絡過泰國足總，但咩都問唔到。始終佢係流浪球員，我哋都好小心處理。」

Philip續指球隊剛與「宇仔」續約3年，惟稱球員有離心，並不會刻意挽留，祝願他在未來飛黃騰達，不過Philip相信經紀背後是另有目的：「依家啲經紀搞到好亂，唔知係咪過冷河再賣去第度，我相信佢係有啲目的。一陣賣咗『宇仔』去柬埔寨，割咗半邊腎再扔返嚟咪死。」