互惠互利？車仔想用史達寧換辛祖

車路士已經將翼鋒史達寧打入冷宮，放走佢只係時間問題，根據英國《電訊報》爆料，車仔計劃用史達寧交換曼聯翼鋒查頓辛祖，各取所需。

車路士上場英超大勝狼隊6比2，仍然唔見史達寧身影，開季後3場正式賽事都冇入選大軍名單，加上佢件7號球衣已經被柏度尼圖着咗，已冇留隊位置。車仔一直有意簽入查頓辛祖，與此同時，曼聯亦打算放走呢位貴價「水貨」，佢同史達寧嘅踢法同位置相似，兩間球會互換2人，都係一個唔錯選擇。

最關鍵係史達寧周薪高達32.5萬鎊(約335萬港元)，查頓辛祖亦達30萬鎊(約310萬港元)，基本上其他球會冇可能向2人開出呢種天價人工，車路士同曼聯作出交換，屬於最簡單直接做法。