史巴列堤扶正東拿利　意大利復興核心

意大利喺歐國盃失望而回，領隊史巴列堤嘅重建希望，將會擺喺「賭鬼」辛度東拿利身上，呢位紐卡素中場停賽10個月後，雖然復出只踢過84分鐘，但消息指周六(7日)凌晨歐國聯對法國，東拿利將會正選上陣，更係意大利嘅核心。

史巴列堤表明會繼續用3中堅陣式，無論係3-5-2定係3-4-2-1，墮後派牌中場角色都係為東拿利度身訂造。歐國盃期間用佐真奴費路或白賴仁基斯坦迪，都收唔到預期效果，而東拿利嘅活力同傳球視野，正正就係史巴列堤心目中嘅完美人選。

史巴列堤表示：「東拿利(停賽期間)一直有練波，我哋對佢好有信心，我哋呢段時間有好多交流，佢不斷深切反省自己，佢已經完全準備好。」意大利今個國際賽期，會喺歐國聯作客法國同以色列。