麥巴比斷崖式下滑　一項差劣數據離晒譜

法國喺歐國聯出師不利，主場1比3輸畀意大利，球星基利安麥巴比狀態持續低迷，今仗只有2次射門1次中目標，最離譜係16次失去控球權，輿論質疑呢位25歲前鋒早熟早殘，可能已經過咗球員生涯顛峰時期。

基利安麥巴比今夏高調由巴黎聖日耳門加盟皇馬，以為事業可以更上一層樓，但事與願違，佢腳風非常唔順，踢到第4輪西甲先至取得首個聯賽入波。呢位神鋒返到國家隊，演出亦令人失望，今仗踢足全場，只有2次射門1次中目標，冇入波亦冇助攻，更加有16次失去控球權。

麥巴比近7次為法國上陣，僅入1球12碼，並已經連續4場國際賽食白果，成為佢自2021年以來最長國家隊入球荒。

賽後網民質疑基利安麥巴比顛峰時期已過：「25歲應該係黃金時期，但麥巴比已走下坡」、「除咗速度，佢一無是處」、「表現斷崖式下滑，太令人失望」。不過，有分析指麥巴比最擅長位置係左翼，但佢現時效力皇馬及國家隊，都被安排踢中鋒，限制佢發揮。