穆斯亞拿1入波+3助攻　德國5比0數匈牙利

歐國盃後經歷大換血嘅德國，周日(8日)凌晨歐國聯A3組重新出發，首仗即喺主場5比0大勝匈牙利，當中穆斯亞拿演出光芒四射，交出1入波加3助攻嘅完美數據，用表現為自己落選「金球獎」候選名單爭番啖氣！

德國前場精銳盡出，最大改變係將箭頭夏維斯轉做「10號」，令富克洛得以正選上陣，佢喺27分鐘就接應穆斯亞拿傳送先開紀錄。下半場德國爆發，穆斯亞拿58分鐘射成2比0，之後再助攻科利安華迪斯同阿歷山大柏夫洛域入波，上演助攻帽子戲法；尾段夏維斯博到12碼，自己操刀射入埋齋，助德國大勝5比0。

德國新任隊長甘美治賽後表示：「我唔知金球獎評選準則係點，但最好嘅球員應該喺名單上，穆斯亞拿就係其中之一，今場佢再次證明。」領隊拿高斯文亦表示：「穆斯亞拿同科利安華迪斯係天才，佢哋合作嘅話好難抵擋，兩人都有潛力成為未來金球獎得主。」