荷蘭大勝！舒克斯擔正入波　迪歷特「孭鑊」

歐國聯A3組賽事，荷蘭主場5比2大破波斯尼亞，「曼聯雙星」成為主角，前鋒約舒亞舒克斯喺國家隊首度擔正即入波，不過中堅馬菲斯迪歷特就孭晒鑊，兩個失球都係由佢嘅失誤造成。

荷蘭13分鐘有沙維西蒙斯射門被閂高，舒克斯喺門前頭槌跣入，不過波斯尼亞27分鐘追平，迪歷特包晒越位下被對手單刀射入。荷蘭完半場前由舒克斯助攻雷恩達斯再度領先，加普56分鐘建功拉開比數，點知73分鐘迪歷特又犯錯，面對對手長傳竟然「眼神防守」，望住身後嘅迪斯高頂入。好在荷蘭最後再憑韋格賀斯同沙維西蒙斯入波，5比2大勝而回。

對於迪歷特嘅犯錯，領隊朗奴高文賽後表示：「佢已經意識到自己企位有問題，呢啲事唔應該發生，但錯誤係比賽一部份，唔需要大造文章。」