香港隊　成功奪冠　盧斯爾：要適應硬朗踢法

香港男子足球代表隊周日（8日）逼和斐濟，憑較佳得失球差力壓對手，奪得三角賽冠軍，暫代主教練盧斯爾認為球隊仍有不少改善空間，盼球員往後面對風格較為硬朗的對手都能踢出水準。

港隊日前以3比0擊敗所羅門群島，今仗亦成功逼和東道主斐濟，收穫賽事冠軍，暫代主教練盧斯爾承認是役絕不輕鬆：「上半場踢得一般，雖然換邊之後有少少改善，但斐濟真係好硬淨，令我哋好難踢出部署，但最緊要係贏到冠軍，完成今個國際賽期最大目標。」

談到球隊經過斐濟三角賽後的得着，盧斯爾指23位代表隊球員，都先後獲得上陣機會，吸取經驗，有助他們將來應對不同對手：「好開心見到今個國際賽期，所有球員都有落場踢，其中幾個球員（伍瑋謙、周子謙及吳宇曦）更加係第1次幫『大港腳』上陣，而且所羅門群島同斐濟，都踢得比較硬朗，希望將來再對住風格相近嘅對手，會適應得好啲。」