法國2比0贏比利時　麥巴比失單刀被噓

周二(10日)凌晨歐國聯A2組賽事，法國主場以2比0擊敗比利時，王牌球星基利安麥巴比今場先做後備，不過佢入替後再度錯失單刀機會，慘被主場球迷柴台，領隊迪甘斯賽後亦批評球迷嘅負面反應。

法國上場輸畀意大利，麥巴比演出備受批評，今場呢位皇家馬德里球星先坐冷板，法國鋒線反而更加流暢，29分鐘就由高路梅安尼先開紀錄，奧士文尼迪比利喺57分鐘再入1球。麥巴比喺67分鐘後備登場，有限時間內就錄得4次射門(2次命中)，不過其中一球單刀就被門將封走，喺法國國家隊入球荒增加到5場，連主場球迷都報以噓聲。

迪甘斯賽後表示：「噓聲係比賽一部份，球迷表達失望同不滿係無可厚非，不過球員正喺球場上努力比賽，我唔認為呢啲噓聲對球隊有任何好處。」對於麥巴比嘅入球荒，迪甘斯就話：「麥巴比同好多球員一樣未到100%，佢遲早會入波，唔需要放大事件，有佢在陣法國會更強，我相信1個月後佢會表現更好。」