領先兼打多個都冇用　國足不敵沙特

世界盃外圍賽亞洲區第三圈C組，周二(10日)進行第二輪賽事，中國主場迎戰沙特阿拉伯。首戰吞7蛋嘅中國初段藉對方烏龍球兼領紅牌領先，結果仍然輸1比2，小組2連敗，沙特則打開勝利之門。

中國初段有個夢幻開局，14分鐘一次角球攻擊，蔣聖龍門前逼使對方阿羅查米頂入己方龍門，球證最終判為沙特烏龍球，主隊中國領先1比0。

4分鐘後雙方一次中場爭奪，蔣聖龍與穆罕默德卡奴碰撞，卡奴伸腳撐中蔣聖龍肚腹，球證翻看VAR後出示紅牌將卡奴趕出場，沙特十人應戰兼落後一球。

不過其後中國隊不但未能取得優勢，更被沙特圍攻，39分鐘沙特一次角球攻勢，卡迪殊近柱頭槌破網追成1比1，中國亦有武磊頭槌攻門中楣角，半場踢成1比1。

下半場中國又一次角球攻勢，王上源近門送球入網，可惜佢越位食詐胡，沙特艾達沙尼另一次攻勢勁射中楣，比賽末段雙方搏拳，90分鐘沙特角球，卡迪殊再度頭槌建功，協助球隊2比1絕殺中國。