域陀摩西斯告別俄超　自由身投盧頓

踢過車路士同利物浦、贏過英超嘅域陀摩西斯，今夏離開俄超後回復自由身，周二（10日）重返英倫，英冠盧頓官方宣布簽入呢位33歲翼衞，簽約一年。

域陀摩西斯在水晶宮出身，初出道時水晶宮仍在英冠，所以今次再戰英冠對佢唔陌生，佢對上一支球隊係莫斯科斯巴達，共效力3季，上季上陣19場入1球，今夏約滿離隊。

呢位前尼日利亞國腳生涯最成功在車路士度過，先後贏過英超、英足盃同兩次歐霸盃，在莫斯科斯巴達亦贏得俄盃，國家隊方面亦幫尼日利亞贏過非國盃。

盧頓上季護級失敗，重返英冠，今季頭4場1和3負，現時排23位，域陀摩西斯加盟可謂及時雨。