法蘭基迪莊同巴塞反面？拒做手術繼續養傷

荷蘭中場法蘭基迪莊今年4月足踝受傷後，復出日期一推再推，至今仍然未能復出。據西班牙《每日體育報》報道，巴塞隆拿軍醫建議呢位荷蘭國腳進行手術，不過已被法蘭基迪莊拒絕，令雙方關係再陷新低。

盛傳法蘭基迪莊同巴塞會長拉波塔不和，今個夏天巴塞就曾向多間球會主動兜售法蘭基迪莊，但係未能成事。法蘭基迪莊嘅右腳足踝傷患，最初預期6月中康復，結果西甲開鑼都未踢得，教練費歷克本來希望國際賽期間再幫佢嘗試復操，但消息指法蘭基迪莊仍然處於單獨操練狀態，復出無期。

《每日體育報》報道，巴塞方面唔希望無了期等待，希望透過手術縮短康復時間，不過法蘭基迪莊就唱反調，堅持用「保守療法」等傷患自然康復，巴塞對此非常不滿。法蘭基迪莊同巴塞仲有差唔多2年合約，教練費歷克曾表示法蘭基迪莊係佢計劃一部份。