車路士走「法律罅」吹唔漲　財政條例玩完

英超近年收緊財政規限，愛華頓、諾定咸森林上季都被扣分，原本今夏仲有更多球會面臨「爆煲」，不過車路士、阿士東維拉、愛華頓等就勁走「法律罅」，英超行政總裁馬斯達斯日前承認「吹佢唔漲」，令英超「盈利及可持續發展條例」名存實亡。

英超規定所有球會喺近3個球季，合共唔能夠錄得超過1.05億鎊虧損，不過當中有唔少會計上嘅灰色地帶，例如賣出青訓球員，所得轉會費會計算為「即時盈利」，相反買球員嘅開支，就會按合約年期分開計算，結果令幾間瀕臨爆煲球會大玩「互買青訓」。

維拉今夏用3,750萬鎊買車路士青訓伊恩馬特臣，車路士就用1,900萬鎊買番維拉18歲小將基利文；維拉又用1,000萬鎊買愛華頓小國腳杜賓，再以900萬鎊賣番中場伊路格布南去愛華頓。連串高價青訓交易，成功幫佢哋造靚盤數。

對於呢種方法，英超行政總裁馬斯達斯表示冇嘢可以做：「我哋嘅工作係確保球會符合守則內嘅規條，每間球會都有自己嘅財政規劃，我哋唔在乎規劃嘅內容，只係睇個結果係咪合符規例。」