曼市射手隔代對決　夏蘭特打破朗尼紀錄

周六(14日)晚英超，曼城開賽22秒失波，但憑大勇嘅射手艾寧夏蘭特梅開二度，主場以2比1反勝賓福特，成為唯一4戰全勝球隊，夏蘭特亦超越曼聯名宿朗尼，成為英超史上首位開季頭4場聯賽入到9球或以上嘅球員。

曼城球員精神唔夠集中，中堅史東斯解圍失誤，被賓福特前鋒尤尼韋沙「執雞」頂入，當時只係開賽22秒，成為英超史上，對衞冕球隊最快入波。不過「藍月亮」始終整體質素佔優，踢到19分鐘，艾寧夏蘭特近門轉身抽射入網扳平1比1。

僅過13分鐘，曼城門將艾達臣摩拉斯大腳長傳，艾寧夏蘭特單刀冷靜射入反超前2比1，呢位24歲挪威國腳今季4場英超都有波入，合共有9球進帳，超越2011/12年球季嘅朗尼(首4場入8球)，成為英超史上開季頭4場聯賽最多入波嘅球員。

曼城將於嚟緊周四(19日)凌晨歐聯主場對國際米蘭，下半場有所留力，未能再增添紀錄，但無阻球隊4戰全勝排榜首。