基沙文1射1傳　馬體會絕殺RB萊比錫

周五(20日)凌晨歐聯，馬德里體育會主場以2比1擊敗RB萊比錫，33歲老將基沙文射入扳平1球之外，仲喺臨完場前貢獻助攻，率領球隊驚險反敗為勝，主帥施蒙尼應該慶幸今夏留住呢位法國國腳。

RB萊比錫今仗反客為主，開賽4分鐘打快攻，由班捷文施斯高頂入打開紀錄。馬體會落後之下，傾力反攻，包括前鋒安祖哥利亞射門中柱彈出。戰至28分鐘，馬高斯洛蘭迪右路傳中，基沙文順勢勁射入網扳平1比1。

馬體會繼續圍攻對手，全場有20次射門，反觀RB萊比錫僅6次射門，眼見雙方可能握手言和之際，基沙文再次發威，佢喺89分鐘左路傳中，由荷西基文尼斯近門頂入致勝1球。

賽後基沙文順理成章當選今場最佳球員，呢位老牌射手將於明夏約滿，其他球會今夏只需要支付1,000萬歐元(約8,700萬港元)就可以買斷佢，曾傳出美職球隊FC洛杉磯計劃簽入基沙文，佢最終選擇留隊，近2場比賽都有波入，演出更勝由曼城來投嘅貴價前鋒祖利安艾華利斯。