基利靴7次撲救成紅軍英雄　但打算冬季離隊

利物浦喺周六(21日)晚英超主場以3比0大勝般尼茅夫，除咗入波嘅路易斯迪亞斯、達雲紐尼斯之外，臨危受命擔正嘅副選門將基利靴亦功不可沒，呢位25歲愛爾蘭國腳有7次成功撲救，成為紅軍力保不失嘅英雄，但佢為咗獲得更多上陣機會，打算明年1月轉會市場重開後離隊。

利物浦門將艾利臣比加賽前受傷，基利靴今場終於獲得正選上陣，亦係佢今季首次披甲，保持出色狀態，全場有7次成功撲救。賽後基利靴喺社交網上載自己比賽相片話：「全取3分兼零封。」似乎非常滿意自己表現，網民認為基利靴借今次貼文「示威」，令會方知道佢有能力做1號門將。

利物浦近6年都由艾利臣比加正選把關，並確認華倫西亞門將馬馬達舒維尼將於下季加盟，作為艾利臣比加嘅接班人，基利靴留隊要上位非常困難，難怪佢想轉會。