曼聯CEO宣布「150計劃」　英超冠軍要等4年？

曼聯自新老闆拉特克利夫掌權後，全隊上下都進行改組，據報由曼城挖角嘅新任行政總裁貝拉達，上星期召集曼聯所有員工，宣布「150計劃」嘅雄圖大計，目標係喺曼聯150周年會慶嗰陣贏英超冠軍，有曼聯球迷表示仲要等多4年！

據《The Athletic》報道，貝拉達上周三(18日)召集所有球會員工，講解佢同拉特克利夫嘅發展大計，並命名為「150計劃」，因為曼聯喺1878年創立，2028年就係創會150周年，曼聯目標係喺呢一年重奪英超冠軍，包括曼聯女足都要喺呢年贏英超冠軍。

事實上，拉特克利夫上季亦有類似言論：「我哋盤算嘅唔係咩10年計劃，因為球迷會失去耐性，肯定會有3年計劃，但要曼聯下季即刻踢到好似曼城咁係不切實際，我哋唔會畀錯誤嘅期望。」C朗拿度早前曾批評曼聯唔應該公開承認「冇力爭冠」，估唔到連CEO都咁早投降。

紅魔球迷聞言反應一般：「仲要等4年」、「哪來的自信？」、「即是仲有4年時間霉！」，有敵對球迷更指「攞英冠易啲喎！唔使等4年。」