同安歷基嘈交　奧士文尼迪比利被罰內部停賽

周三凌晨歐聯焦點戰阿仙奴對巴黎聖日耳門，作客嘅PSG將會讓「單車」，據報該隊主力射手奧士文尼迪比利因為同主教練安歷基嘈交，結果以紀律問題被罰內部停賽，對阿仙奴之戰除名。

法國傳媒報爆料，事緣上場法甲對雷恩賽後，奧士文尼迪比利同安歷基發生激烈衝突，安歷基決定以紀律原因罰佢內部停賽，對阿仙奴呢場大戰唔使佢踢。

27歲嘅奧士文尼迪比利效力巴塞時期有唔少紀律問題，包括練波同比賽都試過遲到，又好容易受傷，不過自從佢成婚後修心養性專心踢波，表現回復穩定，近年更係法國隊同PSG嘅必然正選。

呢位法國射手今季法甲6場全部上陣，交出4球4助攻數據，對雷恩一戰亦交出助攻，原本預計對阿仙奴都係必然正選，但竟然咁大膽得罪安歷基，暫時要坐內部波監，如果真係唔出佢，即係變相益咗阿仙奴。