死球戰術又奏效　阿仙奴輕取PSG

周三(2日)凌晨歐聯大戰，阿仙奴主場以2比0擊敗巴黎聖日耳門(PSG)，兵工廠又發揮死球戰術威力，布卡約沙卡主射罰球入網，亦係阿仙奴繼今季英超對熱刺、李斯特城、曼城之後，再次利用定位球部署，攻入對手大門，成為一大贏波殺着。

開賽20分鐘，李安度杜沙特長傳入禁區，夏維斯近門頂入打開紀錄。15分鐘之後，布卡約沙卡喺右路邊線，處理罰球，佢似傳非傳，似射非射，皮球門前大漏，彈地入網，睇落有幸運成份，但其實阿仙奴今季已多次利用死球戰術入波，包括英超對熱刺、曼城，布卡約沙卡開出角球，同樣由加比爾馬加希斯頂入，對李斯特城，又係布卡約沙卡開出角球，李安度杜沙特攻門，令對手擺烏龍。

今次唯一唔同係布卡約沙卡直接射入罰球，呢位23歲英格蘭翼鋒今季9次上陣，已創造7個入波，包括射入2球及5次助攻，成為兵工廠進攻發動機。

此外，阿仙奴防守力亦相當出色，令攻力強橫嘅PSG苦無入波機會，今年各項賽事32場有17場不失球，歐洲5大聯賽同期之中，僅次於18場不失球嘅皇馬。