利物浦贏唔停　沙拿成歐聯「非洲士哥王」

英超勁旅利物浦今季狀態大勇，周四(3日)凌晨歐聯主場2比0輕取博洛尼亞，成為7支2輪全勝球隊之一。埃及前鋒穆罕默德沙拿今仗又有入波，超越科特迪瓦名將杜奧巴，成為歐聯史上入波最多嘅非洲球員。

利物浦今場強陣出擊，11分鐘阿歷斯麥亞里士打接應沙拿傳中射入。落後嘅博洛尼亞全力反撲，可惜幾次埋門中楣又中柱，加上門將艾利臣比加連番靚救，利物浦保住唔失波之餘，75分鐘再靠沙拿右路推大位射入，「紅軍」得以2比0贏波。

呢球係沙拿歷來歐聯第45個入波，超越前車路士球星杜奧巴(44球)，成為歐聯史上「非洲士哥王」，排第3位嘅喀麥隆前鋒伊度奧只有30球。荷蘭主帥施洛上任後9場8勝，創造利物浦史上新帥最佳紀錄，佢賽後表示：「要喺利物浦創造歷史係好困難，證明我哋嘅開季係好出色，球隊之前一直都好成功，所以我唔需要改變太多，最重要係大家都好受落。」