搶鏡過沙拿　格雲貝治當選利物浦9月MVP

利物浦近況大勇，排英超榜首及歐聯2戰2勝，中場賴恩格雲貝治發揮重要作用，呢位22歲荷蘭國腳獲紅軍球迷選為利物浦9月最佳球員，可見佢演出比穆罕默德沙拿等星級隊友更加搶鏡。

利物浦9月踢6場比賽，取得5勝1負，除咗英聯盃以副選對韋斯咸之外，賴恩格雲貝治另外5場都擔任正選，表現瞻前顧後，其中歐聯對AC米蘭及英超對狼隊，佢都當選最佳球員，所以今次獲選為利物浦9月最佳球員，絕對實至名歸。

賴恩格雲貝治攞獎後話：「我第一次獲得呢項殊榮，覺得好自豪，我哋擁有好多優秀球員，例如路易斯迪亞斯9月入咗4球，佢表現都非常好，十分感謝球迷投我一票。」賴恩格雲貝治上年夏天以4,000萬歐元(約3.4億港元)轉會費，由拜仁慕尼黑加盟利物浦，上季演出一般，球隊今季由荷蘭同胞施洛執教後，佢獲得重用，並以行動證明身價。