【官宣】曼聯簽16歲天才神鋒　曾1場入利物浦10球

曼聯積極招攬年輕球員，現時又有重大收穫，正式宣布從阿仙奴手上，搶走16歲天才射手奧比馬田，呢位丹麥小國腳曾於U16賽事，1場射入利物浦青年軍10球，將來升上紅魔鬼一隊，同海倫組成丹麥版「黑白雙煞」，實在令人期待。

奧比馬田今年7月宣布離開阿仙奴青年軍後，立即吸引曼聯、拜仁慕尼黑、多蒙特等多間球會爭奪，結果曼聯成為贏家，成功說服佢成「魔」。不過，由於呢位新星轉會程序比較複雜，需要經過英超賽會5個步驟審核，日前終於完成所有手續，現時正式同曼聯簽約，成為青年軍球員。

身高1米88嘅奧比馬田曾於上年11月U16聯賽，為阿仙奴14比3大炒利物浦，佢射入10球，可見實力大超班，加入曼聯後，相信不久將來有望獲提升上一隊。

曼聯今夏已簽入18歲法國後衞蘭尼約路、18歲馬里中場施高干尼，加上16歲前鋒奧比馬田，成為球隊未來中軸線。