佐敦軒達臣遭阿積士冷落　冬季或重投母會踢英冠

前利物浦隊長佐敦軒達臣今年1月離開沙特阿拉伯球隊伊蒂法克，轉投荷甲勁旅阿積士後，不受重用，僅於聯賽上陣13次。根據英國《太陽報》爆料，指呢位34歲英格蘭中場打算明年1月轉會市場重開後離隊，可能重返母會新特蘭，希望幫助呢支英冠球隊升上英超。

佐敦軒達臣雖然擔任阿積士隊長，但並非必然正選，就算有得擔正，亦多數踢唔足全場，令佢意興闌珊。早前歐霸盃阿積士主場對比錫達斯，佐敦軒達臣不滿隊友貝特蘭查奧爾犯錯，發火鬧爆呢位翼鋒，引起內訌疑雲，令佢更加難喺隊內立足，因此傳出呢位老將想重返英格蘭搵食，並唔介意踢英冠，首選新特蘭。

佐敦軒達臣出身於新特蘭青訓系統，並於2008至11年為呢支綽號「黑貓」嘅球隊踢3季英超，打出名堂後轉投利物浦，佢對母會有一份深厚感情。新特蘭今季成績出色，位居英冠榜首，如果有佐敦軒達臣回巢助陣，應該可以進一步提升奪取英超席位機會。