高普擔任紅牛足球主管　可隨時接手德國隊

今夏離開利物浦嘅高普宣布復工，不過唔係教波，據報佢將會出任紅牛足球全球策略主管，合約包括可隨時解約接手德國隊，高普本人亦喺個人社交平台「官宣」。

高普執教利物浦9年後表示「能量耗盡」，但估唔到休息5個月就已經「回夠電」，不過佢復工並非擔任某支球隊嘅主教練，咁又唔算呃人，而且做嘅職位比主教練高好多級，層次都唔同。

高普為利物浦留下一個強勁陣容班底，畀新帥施洛繼承，而施洛亦順利交接，領軍10戰9勝1負，聯賽排緊榜首；至於高普嘅新工作，就係主管紅牛所有球隊事務，包括RB萊比錫、薩爾斯堡同紐約紅牛等隊，球隊嘅比賽理念，為球員同教練培養同轉會提供建議。

較為特別嘅係，高普同紅牛嘅合約特別加多一項條款，就係當德國國家隊邀請佢執教時，高普有權隨時解約離職，德國早前同拿高斯文續約至2026世盃，換句話說，如果拿高斯文到時約滿離隊，德國邀請高普接手，紅牛就要放人。