賓特尼奴拒德國重召　甘美治鬧爆！

德國喺今夏歐國盃後進行重建，門將紐亞退役後，終於等到正選嘅達史特根早前又告重傷，令德國要再覓「1號」人選。效力富咸嘅賓特尼奴本來獲得徵召，不過呢位32歲球星竟然拒絕，德國隊長甘美治周三(9日)公開批評賓特尼奴做法，怒稱德國唔需要「冇心」嘅人效命。

曾經9次代表德國上陣嘅賓特尼奴，日前證實獲德國領隊拿高斯文徵召，但佢唔滿意被通知上陣機會唔大，所以寧願拒絕，呢位富咸門將表示：「佢哋通知我入選德國隊，不過冇乜機會上陣，呢個係我決定留番喺倫敦練波嘅原因。如果我真正可以幫助到德國隊，拿高斯文知道我會好樂意。我已經32歲，唔再係新丁。」

不過賓特尼奴拒絕徵召嘅行動，就引嚟德國新隊長甘美治強烈不滿，該拜仁慕尼黑球星回應：「如果有人唔鍾意喺國家隊，佢就唔需要出現，我哋有足夠樂意為德國隊效命嘅球員。能夠入選德國隊，應該係每一個球員嘅光榮。」