【世盃外】又反輸！中國不敵澳洲3連敗

周四（10日）世盃外亞洲區第3圈C組大戰，中國再次喺領先情況下反輸，作客以1比3不敵澳洲，頭3輪全部輸晒，出線機會大減。

澳洲早前有主帥艾萊特辭職，因此今場係新帥普波域首度領軍，一開波即刻撳住攻，不過先開紀錄嘅卻係中國，20分鐘門將王大雷大腳開龍門球，張玉寧頭槌跣後，謝文能入楔快射得手。不過「袋鼠兵」完半場前由路易斯米拿接應奇治葛雲罰球扳平。

易邊後澳洲繼續搶攻，先有奇治葛雲轟入世界波反先，完場前後備入替嘅維里皮利整多粒，最終反勝3比1。中國繼上場反輸畀沙特阿拉伯1比2後，再次反勝為敗，現時喺世盃外第3圈C組頭3輪全敗排包尾，出線機會進一步受削，澳洲則打開勝利之門。