阿仙奴防沙特挖角　向杜沙特開新合約

阿仙奴今夏引入英格蘭翼鋒史達寧後，前線競爭更加激烈，沙特豪門伊蒂哈德曾開價3,500萬歐元，希望搶走比利時翼鋒李安度杜沙特，不過被「兵工廠」拒絕。據報阿仙奴更準備開出新合約，希望「綁實」呢位高效球星。

杜沙特喺阿仙奴主力踢左翼，要同加比爾馬天尼利爭位，開咧頭3仗2次做後備，一度有傳佢對上陣時間感到不滿，但阿仙奴仍然視佢為重要棋子，尤其馬田奧迪加特養傷期間，佢踢進攻中場表現突出。據《Football Insider》報道，總監伊度準備同杜沙特洽談新約，防止沙特球會再度挖角。

29歲嘅杜沙特同阿仙奴合約去到2026年夏天，目前周薪係9萬鎊，續約嘅話將會大幅加薪。杜沙特上季英超上陣34場，雖然當中只有18場係正選，但已交出12個入波同1次助攻，效率極高。