夏蘭特做隊長又入波　榮登挪威史上入球王

周五(11日)凌晨歐國聯B3組賽事，挪威憑艾寧夏蘭特梅開二度，主場3比0大炒斯洛文尼亞。艾寧夏蘭特今場首次擔任國家隊隊長，入波兼贏波之外，更以34個國際賽入球，成為挪威史上「士哥王」，認真威水！

由於隊長馬田奧迪加特缺陣，24歲嘅艾寧夏蘭特首次戴上挪威隊長臂章，佢喺7分鐘就先開紀錄，阿歷山大索洛夫52分鐘再下一城，10分鐘後艾寧夏蘭特就攻入歷史性1球，呢球係佢個人第34個國際賽入波，超越30年代名將佐贊祖夫(33球)，成為挪威史上入波最多球員。

艾寧夏蘭特賽後表示：「呢個係歷史性同重大嘅紀錄，能夠達到呢個紀錄當然令人開心......我仲有好多年可以踢，依家享受緊我嘅足球。」挪威大勝後以3戰7分排喺B3組榜首，佢哋周一(14日)凌晨將會作客同組最強對手奧地利。