施捷斯尼堅拒戒煙：關你哋叉事？

夏天宣布退休嘅波蘭門將施捷斯尼，早前「出山」加盟巴塞隆拿，不過波都未踢就惹上是非，呢位門將被影到煲煙相片，受到唔少批評，但施捷斯尼就堅拒戒煙，更豪言：「我食煙關你哋叉事？」

施捷斯尼接受《世界體育報》訪問，就煲煙相片回應：「我嘅私人生活有啲嘢係唔會改變，我食煙關其他人叉事？我認為我嘅工作都冇受到影響。我唔會喺細路面前食煙，因為唔想影響佢哋，但如果有人匿喺棵樹後面偷影我食煙嘅相，呢個係佢嘅問題，唔關我事，我會繼續過我嘅生活。」

施捷斯尼早喺效力阿仙奴時間，已經被揭發曾經喺更衣室入面食煙，西班牙著名電視主持卡拉斯高，亦批評施捷斯尼拒絕戒煙嘅態度：「巴塞隆拿球員有好高嘅職業操守要求，施捷斯尼嘅言論實在係不能接受。」