高普人工多過18位英超領隊　網民：難怪願做偽君子

前利物浦主帥高普早前「出山」，擔任紅牛足球全球策略主管，現時薪酬數字曝光，年薪達到1,000萬鎊(約1億港元)，多過18位英超領隊人工，網民指呢位57歲德國名帥都只不過係向錢看嘅「偽君子」，背叛咗利物浦。

英國《太陽報》指高普將於明年1月正式開始新工作，獲得1,000萬鎊年薪，如果同現時20位英超領隊比較，僅少於曼城主帥哥迪奧拿嘅2,000萬鎊，並同阿仙奴領隊阿迪達睇齊，換言之，多過另外18位英超領隊人工。

最重要係高普新工作並冇爭標、奪冠等要求，壓力遠比做領隊少，加上合約包括可隨時解約接手德國隊，簡直係超級筍工，難怪可以打動高普。

高普原本計劃休息1年，但未夠半年就復出，引起唔少紅軍球迷不滿，認為佢冇口齒、偽君子，以後都唔會再尊重佢。