紅軍擔正前出事　基利靴蝦碌　愛爾蘭輸波

星期一(14日)凌晨歐國聯B2組，愛爾蘭作客吞希臘雙蛋。愛爾蘭門將基利靴今場本來係英雄，上半場屢救險球，但完場前一次「自殺式」助攻，交個波畀希臘鎖定勝局。對於未來1個月會為利物浦擔正嘅基利靴，信心可能會受到打擊。

由於巴西鋼門艾利臣比加受傷要抖超過1個月，利物浦未來一段日子會重用基利靴把關，呢位愛爾蘭國腳今場表現對辦，上半場3度救出險球，係愛爾蘭頑抗希臘嘅大功臣。下半場早段失守嘅愛爾蘭，最後階段奮力反撲氣勢強勁，估唔到向來用波唔差嘅基利靴，補時階段突然自爆輸多粒，令愛爾蘭返魂乏術。

愛爾蘭將帥賽後都力撐呢位門將，前鋒特萊柏洛特表示：「喺球隊氣勢最強嘅時候犯錯，實在係一大打擊，不過賽事已經過去，更衣室所有人都支持基利靴。」領隊賀基姆臣亦表示：「經常都講贏輸係全隊嘅事，唔可能輸波就賴門將，我哋今場發力太遲，先係輸波最大原因。」