18歲新星一戰成名　PSG「人才庫」大豐收

周日(20日)凌晨法甲，巴黎聖日耳門(PSG)主場以4比2擊敗斯特拉斯堡，18歲中場辛尼馬約魯演出光芒四射，射入1球，仲有1次攻門中柱，加上另1位新星巴特利巴高拿亦建一功，PSG新一代「人才庫」大豐收。

辛尼馬約魯出身於PSG青年軍，今年3月首次為一隊上陣踢法甲，上季季尾對羅連安特，首次貢獻助攻。PSG主帥安歷基非常欣賞呢位小將，今場安排辛尼馬約魯踢正選，佢不負所望，開賽5分鐘有1次勁射中柱彈出。不過，辛尼馬約魯好快取得職業生涯首個法甲入波，19分鐘接應巴特利巴高拿傳送射入，佢原本有機會梅開二度，可惜單刀射高。

換邊之後，PSG由馬高阿辛斯奧、巴特利巴高拿、李康仁各入1球，輕鬆取勝。雖然PSG以往經常天價收購球星，但近年轉換策略，開始提拔年輕球員，包括已進身法國大國腳嘅18歲中場薩伊艾美利、22歲前鋒巴特利巴高拿，加上辛尼馬約魯冒起，本土化政策見效，可以節省唔少開支，避免違反公平財政條例。