東網電視
更多新聞短片
卡拉科利(右)整傷膝部，退下火線。(Getty Images)
周三(23日)凌晨歐聯，阿仙奴憑對手擺烏龍，主場以1比0擊敗薩克達，取得歐聯2連勝，但亦付出沉重代價，左後衞卡拉科利整傷膝部，退下火線，可能無法出戰下周一(28日)凌晨英超主場對榜首利物浦。
阿仙奴開賽29分鐘打開紀錄，加比爾馬天尼利左路個人突破後，扣入中路起腳，雖然射門中柱，但反彈省中薩克達門將列斯尼克入網，認真夠運。
戰至下半場中段，有薩克達球員喺禁區內犯手球，球證睇完VAR後判罰12碼，李安度杜沙特主射，被門將列斯尼克用腳擋出，幸好阿仙奴最終仍然可以保持勝果至完場。
不過，阿仙奴主帥阿迪達就笑唔出，因為卡拉科利傷勢似乎唔輕，呢位意大利國腳喺9月份都曾經膝部受傷，今次可能觸傷舊患。由於富安健洋、祖利安添巴、基蘭泰亞尼都有傷在身，卡拉科利離場後，阿迪達焗用18歲小將利維斯史基利入替佢，可見兵工廠出現左閘荒，如果卡拉科利未能復出對利物浦，阿仙奴防線將面臨重大危機。
