阿仙奴不敵紐卡素　近3場聯賽僅得1分

英超早場，阿仙奴作客0比1不敵紐卡素，連續3場聯賽失分。「兵工廠」早段防守有漏洞，先落後0比1，但佢哋之後進攻乏力，最終全失3分，紐卡素翼鋒安東尼哥頓今場表現出色，自上季至今英超主場9次對Big6球隊交出7球4助攻，堪稱大賽球員。

阿仙奴今場有加比爾馬加希斯傷愈復出，同威廉沙列巴鎮中路，不過左閘祖利安添巴多次走漏安東尼哥頓，結果出事，開賽12分鐘，安東尼哥頓右路傳中，阿歷山大伊沙克搵到空位頭槌破網，紐卡素領先1比0。

阿仙奴失波後搶番唔少攻勢，但就唔到肉，上半場最近磅係米基爾馬連奴近射省中人，下半場阿迪達換入辛真高同賓韋特，希望改善邊路攻防表現，不過效果一般，最終輸0比1完場。

阿仙奴近期陷入低潮，近3場英超分別以0比2負於般尼茅夫，2比2和利物浦，以及今場0比1不敵紐卡素，3場僅得1分，爭標受到嚴重挫折。