紐奴爭番口氣！森林相隔36年再入前4位

今季英超最令人驚喜球隊一定係諾定咸森林，呢支「神奇球隊」周六(2日)晚主場以3比0大勝韋斯咸，趁阿士東維拉、車路士遲1日比賽，力壓阿仙奴，暫時升上第3位，亦係森林自1988年之後，再次打入頂級聯賽前4位。

諾定咸森林今場憑基斯活特、赫臣奧杜爾、奧拉艾拿各入1球，贈韋斯咸3蛋，取得英超3連勝，並曾於9月擊敗勁旅利物浦，演出令人刮目相看。森林可以由上季護級球隊，變身成為今季爭前4位份子，領隊紐奴功不可沒，呢位50歲葡萄牙名帥近年先後被熱刺、伊蒂哈德炒魷，依家終於吐氣揚眉。

另外，前鋒基斯活特今季大勇，踢10場聯賽入8球，亦係森林取得佳績嘅功臣。