格連活特又入波　創30年紀錄

周六(9日)凌晨法甲，格連活特又入波，成為馬賽近30年以來，首位上陣11場聯賽入到8球嘅球員，可惜未能挽回敗局，主場以1比3不敵歐塞爾，對於爭標造成沉重打擊。

馬賽今仗表現走晒樣，上半場被歐塞爾3位球員辛拿約高、加坦佩連、咸特查奧爾攻破大門，落後0比3。換邊之後，馬賽教練迪薩比立即作出3個換人調動，表現先至有改善，並於65分鐘由格連活特主射12碼入網追番1球，但始終無法收復失地，近3場聯賽輸2場，落後榜首巴黎聖日耳門6分，兼踢多1場。

雖然馬賽輸波，但格連活特表現仍然出色，全場有3次射門入1球，仲有3次成功扭過對手及3次搶截，並創造8次關鍵傳球，但隊友都未能把握入波機會，實在無奈。