莫路伊卡迪重傷　提早收咧

加拉塔沙雷上場歐霸盃以3比2擊敗熱刺，但亦付出沉重代價，前鋒莫路伊卡迪受傷退下火線，經過檢查之後證實呢位31歲阿根廷球星右膝十字韌帶撕裂及半月板受傷，將接受手術，緣盡今季餘下賽事。

莫路伊卡迪上場踢到85分鐘受傷，並需要用擔架抬離場，當時已經估計傷勢嚴重。其後呢間土耳其球會發表聲明，指莫路伊卡迪嘅右膝十字韌帶撕裂及半月板受傷，即將開刀治療及展開康復工作，土耳其傳媒指呢位射手已經提早收咧。

莫路伊卡迪曾經效力國際米蘭、巴黎聖日耳門等球隊，2022年加盟加拉塔沙雷之後，總共上陣87場，射入61球及22次助攻，效率非常高，佢長抖之後，勢必削弱球隊進攻力。